Foreign Trade Policy Department

    Lao (ພາສາລາວ)English

Main Menu

GATS Enquiry Point

WTO & AEC Center

Who's Online

We have 107 guests online

Visitor Counter

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterToday284
mod_vvisit_counterYesterday990
mod_vvisit_counterThis week1274
mod_vvisit_counterLast week6558
mod_vvisit_counterThis month26017
mod_vvisit_counterLast month31196
mod_vvisit_counterAll days1130338

4th EAS Economic Ministers’ meeting

E-mail Print PDF

ກອງປະຊຸມລັດຖະມົນຕີເສດຖະກິດອາຊຽນ ກັບອົດສະຕາລີ, ຈີນ, ອິນເດຍ, ຍີປຸ່ນ, ສ.ເກົາຫຼີ, ນິວຊີແລນ, ລັດເຊຍ ແລະ ສະຫະລັດອາເມລິກາ ຄັ້ງ​ທີ 4

ໃນ​ວັນ​ທີ 05 ສິງຫາ 2016 ຕອນ​​ເຊົ້າ ທີ່ ​ໂຮ​ງ​ແຮມ​ດອນຈັນ​ພາ​ເລດ, ໄດ້​ມີ​ການ​ສືບຕໍ່ ​ການ​ດຳ​ເນີນ​​ກອງປະຊຸມລັດ​ຖະມົນຕີ​ເສ​ດຖະກິດ​ອາ​ຊຽນ ຄັ້ງທີ 48 ​ແລະ ກອງ​ປະຊຸມ​ອື່ນຯ ທີ່​ກ່ຽວຂ້ອງ; ຊຶ່ງ​ໃນ​ພາກ​​ເຊົ້ານີ້​ແມ່ນ​ໄດ້​ໄຂ​ກອງປະຊຸມປຶກສາຫາລື ລະຫວ່າງ ລັດຖະມົນຕີເສດຖະກີດອາຊຽນ ກັບ ກັບອົດສະຕາລີ, ຈີນ, ອິນເດຍ, ຍີປຸ່ນ, ສ.ເກົາຫຼີ, ນິວຊີແລນ, ລັດເຊຍ ແລະ ສະຫະລັດອາເມລິກາ ຄັ້ງທີ 4 (4th EAS Economic Ministers’ meeting)​ ຂຶ້ນພາຍໃຕ້ການເປັນປະທານ ຂອງ ​ທ່ານ ນາງ ເຂັມມະນີ ພົນເສນາ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ທັງເປັນລັດຖະມົນຕີເສດຖະກິດອາຊຽນ ຂອງ ສປປ ລາວ. ຈຸດປະສົງຂອງກອງປະຊຸມດັ່ງກ່າວແມ່ນ ເພື່ອສືບ​ຕໍ່​ຜົນ​ຂອງ​ການປືກສາ​ຫາລືຮ່ວມ​ກັນ​ໃນ​ກອງ​ປະຊຸມ​ຄັ້ງ​ທີ່​ຜ່ານ​ມາ ​ໂດຍ​ແນ​ໃສ່​ເສີມ​ຂະຫຍາຍ​ການ​ຮ່ວມ​ມື​ດ້ານ​​​ເສດ​ຖະກິດ​ການ​ຄ້າ ​ແລະ ການ​ລົງທຶນ ​ນຳກັນ​ໃຫ້ນັບມື້ນັບຫລາຍ​ຂຶ້ນ.

 

ເວົ້າລວມແລ້ວ, ກອງປະຊຸມຄັ້ງນີ້ແມ່ນໄດ້ດຳເນີນໄປດ້ວຍຜົນສຳເລັດຕາມຄາດໝາຍເປັນຢ່າງດີ ຊຶ່ງໃນນັ້ນ ໄດ້ເຫັນດີນຳກັນຫລາຍປະເດັນດັ່ງນີ້:

  1. ບັນດາລັດຖະມົນຕີໄດ້ໃຫ້ທັດສະນະວ່າ ການສ້າງຕັ້ງປະຊາຄົມເສດຖະກິດອາຊຽນໃນປີ 2015 ເປັນ ບາດກ້າວທີ່ສຳຄັນທີ່ສຸດຂອງຂະບວນການເຊື່ອມໂຍງເສດຖະກິດພາຍໃນພາກພື້ນ. ລັດຖະມົນຕີສະແດງ ຄວາມຊົມເຊີຍຕໍ່ແຜນງານປະຊາຄົມເສດຖະກິດອາຊຽນ 2025, ເຊິ່ງໄດ້ສະແດງໃຫ້ເຫັນວ່າປະຊາຄົມເສດຖະກິດອາຊຽນພາຍໃນປີ 2025 ຈະມີລະດັບການເຊື່ອມໂຍງທີ່ສູງ ແລະ ໜຽວແໜ້ນ; ມີຄວາມສາມາດໃນການແຂ່ງຂັນສູງ, ມີຄວາມຄິດໃໝ່ໆ ແລະ ມີການປ່ຽນແປງຢູ່ສະເໜີ; ໂດຍສົ່ງເສີມໃຫ້ມີການເຊື່ອມຈອດເຊິ່ງກັນແລະກັນ ແລະ ຮ່ວມມືໃນຂະແໜງຕ່າງໆ; ເປັນປະຊາຄົມທີ່ມີຄວາມຢືດຢຸ່ນສູງ, ມີສ່ວນຮ່ວມຂອງທຸກພາກສ່ວນ ແລະ ມີປະຊາຊົນເປັນສູນກາງ; ແລະ ເຊື່ອມໂຍງກັບເສດຖະກິດໂລກ.
  2. ລັດຖະມົນຕີໄດ້ແລກປ່ຽນຄຳຄິດເຫັນກ່ຽວກັບສະພາບການພັດທະນາເສດຖະກິດຂອງບັນດາປະເທດອາຊີຕາເວັນອອກ. ລັດຖະມົນຕີຮັບຊາບວ່າເມື່ອລວມ GDP ຂອງທຸກປະເທດທີ່ເຂົ້າຮ່ວມ EAS ຈະມີມູນຄ່າເຖິງ $ 41.67 ພັນຕື້ໂດລາ ໃນປີ 2015, ຫຼຸດລົງພຽງເລັກນ້ອຍຈາກ $ 42.02 ພັນຕື້ໂດລາ ໃນປີ 2014. ມູນຄ່າການຄ້າລວມຂອງອາຊຽນກັບປະເທດທີ່ບໍ່ໄດ້ເປັນສະມາຊິກຂອງ EAS ຫຼຸດລົງ 4. 9 ເປີເຊັນ ເຖິງ $1.05 ພັນຕື້ໃນປີ 2015 ຈາກ $1.11 ພັນຕື້ໃນປີ 2014. ມູນຄ່າການຄ້າລະຫວ່າງອາຊຽນ ແລະ ກັບປະເທດທີ່ບໍ່ເປັນສະມາຊິກຂອງ ASEAN EAS ມີມູນຄ່າເຖິງ 43.4 ເປີເຊັນຂອງການຄ້າຂອງອາຊຽນທັງໝົດ. ການລົງທຶນຈາກປະເທດທີ່ບໍ່ເປັນສະມາຊິກ ASEAN EAS ມາຍັງອາຊຽນມີມູນຄ່າເຖິງ $ 52.1 ຕື້ ໂດລາ ໃນປີ 2015, ເຊິ່ງກວມເອົາ 43.4 ເປີເຊັນຂອງການຮັບເອົາການລົງທືນທັງໝົດເຂົ້າມາໃນອາຊຽນ.
  3. ດ້ານສາຍພົວພັນການຄ້າ ແລະ ການລົງທຶນ ລວມທັງການພັດທະນາເສດຖະກິດໃນພາກພື້ນນີ້, ລັດຖະມົນຕີຮັບຮູ້ວ່າຄວາມສ່ຽງທີ່ຈະຫຼຸດລົງຍັງມີຢູ່. ການຂະຫຍາຍຕົວຂອງເສດຖະກິດໂລກຄາດວ່າຈະຢູ່ໃນລະດັບປານກາງໃນອັດຕາ 3.2 ເປີເຊັນໃນປີ 2016 ກ່ອນຈະເພີ່ມຂຶ້ນເປັນ 3.7 ເປີເຊັນໃນປີ 2017. ການຂະຫຍາຍຕົວຂອງປະເທດທີ່ມີເສດຖະກິດກ້າວໜ້າຄາດວ່າຈະຢູ່ໃນລະດັບ 1.9 ເປີເຊັນໃນປີ 2016 ໃນຂະນະທີ່ປະເທດເສດຖະກິດຂ້າມຜ່ານ ແລະ ກຳລັງພັດທະນາ, ການຂະຫຍາຍຕົວມີທ່າອ່ຽງທີ່ດີ ຄາດວ່າຈະຢູ່ໃນລະດັບ 4.1 ເປີເຊັນໃນປີ 2016 ຈາກ 4.0 ເປີເຊັນໃນປີ 2015 ໃນສະພາບເງື່ອນໄຂທີ່ມີການຂະຫຍາຍຕົວທີ່ແຂງແຮງຂອງອິນເດຍ ແລະ ປະເທດເສດຖະກິດຂ້າມຜ່ານອື່ນຂອງອາຊີ. ລັດຖະມົນຕີຍັງຮັບຮູ້ອີກວ່າການຝື້ນຕົວທີ່ຊ້າກວ່າຄາດໝາຍຂອງປະເທດຮັ່ງມີ ແລະ ການຂະຫຍາຍຕົວຊ້າຂອງເສດຖະກິດຈີນ, ບວກກັບສະພາບການເງິນຂອງໂລກມີກັນຮັດໂຕຂຶ້ນກວ່າເກົ່າ, ອາດຈະສົ່ງຜົນດ້ານລົບຕໍ່ການຂະຫຍາຍຕົວຂອງພາກພື້ນນີ້.
  4. ລັດຖະມົນຕີ ຢືນຢັນວ່າພວກເຂົາຈະພະຍາຍາມເສີມຂະຫຍາຍການເຊື່ອມໂຍງທາງດ້ານເສດຖະກິດພາຍໃນພາກພື້ນອາຊີຕາເວັນອອກ. ລັດຖະມົນຕີຮັບຮູ້ຜົນສະຫຼຸບຂອງການເຈລະຈາສັນຍາການຄ້າເສລີຂອງຄາບມະຫາສະມຸດປາຊີຟິກ (Tran-Pacific Partnership Agreement-TPP) ແລະ ຄວາມຄືບໜ້າຢ່າງຫຼວງຫຼາຍໃນການເຈລະຈາສັນຍາຮ່ວມເສດຖະກິດຮອບດ້ານພາຍໃນພາກພື້ນ (Regional Comprehensive Economic Partnership (RCEP)).
  5. ລັດຖະມົນຕີສະແດງຄວາມຍິນດີນຳຜົນຂອງກອງປະຊຸມລັດຖະມົນຕີການຄ້າຂອງອົງການການຄ້າໂລກຄັ້ງທີ 10 ທີ່ ໄນໂຣບີ ວັນທີ 19 ທັນວາ 2015, ລວມທັງການຮັບຮອງເອົາ "Nairobi Package", ເຊິ່ງປະກອບມີຫົກມະຕິຮ່ວມຂອງລັດຖະມົນຕີຕໍ່ກະສິກຳ, ຝ້າຍ ແລະ ບັນຫາຕ່າງໆທີ່ກ່ຽວຂ້ອງກັບປະເທດດ້ອຍພັດທະນາ. ລັດຖະມົນຕີເນັ້ນໃຫ້ເຫັນວ່າ "Nairobi Package" ແມ່ນໜຶ່ງໃນຜົນໄດ້ຮັບທີ່ສຳຄັນທີ່ສຸດຂອງກະສິກຳຂອງສະມາຊິກອົງການການຄ້າໂລກ ນັບຈາກມື້ສ້າງຕັ້ງອົງການດັ່ງກ່າວ, ເຊິ່ງມັນຈະນຳຜົນປະໂຫຍດອັນໃຫຍ່ຫຼວງໃຫ້ແກ່ສະມາຊິກທີ່ເປັນປະເທດດ້ອຍພັດທະນາ. ລັດຖະມົນຕີໄດ້ສະແດງການສະໜັບສະໜູນໃຫ້ມີການຈັດຕັ້ງປະຕິບັດໂດຍໄວຕໍ່ສັນຍາຕ່າງໆທີ່ໄດ້ຕົກລົງກັນໄວ້ຢູ່ ໄນໂຣບີ, ລວມທັງສັນຍາຕ່າງໆທີ່ໄດ້ຮັບຮອງກ່ອນໜ້ານີ້ໃນກອງປະຊຸມລັດຖະມົນຕີການຄ້າອົງການການຄ້າໂລກປີ 2013 ຢູ່ບາລີ, ລວມໄປເຖິງສັນຍາວ່າດ້ວຍການອຳນວຍຄວາມສະດວກທາງດ້ານການຄ້າ ແລະ ບັນຫາຕ່າງໆຂອງກະສິກຳ.
  6. Updates on ERIA’s Activities ຄວາມຄືບໜ້າຂອງກິດຈະກຳພາຍໃຕ້ໂຄງການ ERIA
  7. ລັດຖະມົນຕີເນັ້ນໜັກຄວາມສຳຄັນຂອງການປະສານງານລະຫວ່າງ ERIA (ສະຖາບັນຄົ້ນຄວ້າເສດຖະກິດຂອງອາຊຽນ ແລະ ອາຊີ) ແລະ ຜູ້ວາງນະໂຍບາຍຂອງປະເທດ EAS. ຕໍ່ບັນຫານີ້,ລັດຖະມົນຕີຍິນດີຕໍ່ຜົນສຳເລັດໃນການຈັດກອງປະຊຸມໂຕະມົນເພື່ອສົນທະນາລະຫວ່າງ ເຈົ້າໜ້າທີ່ອາວຸໂສຂອງປະເທດ EAS ກັບ ສະຖາບັນຄົ້ນຄວ້າເສດຖະກິດຂອງອາຊຽນ ແລະ ອາຊີ, ເຊິ່ງໄດ້ຈັດຂຶ້ນໃນວັນທີ 1 ກໍລະກົດ 2016 ທີ່ ວຽງຈັນ, ສປປ ລາວ.  ລັດຖະມົນຕີຍັງຊົມເຊີຍຕໍ່ຄວາມຄືບໜ້າຂອງ ກິດຈະກຳການຄົ້ນຄວ້າໃນອະນາຄົດຂອງ ERIA, ລວມທັງບົດຄົ້ນຄວ້າກ່ຽວກັບມາດຕະການກີດຂວາງການຄ້າທີ່ບໍ່ແມ່ນພາສີ ແລະ ບົດຮຽນການຄຸ້ມຄອງທີ່ດີ. ລັດຖະມົນຕີຍັງໄດ້ຊີ້ໃຫ້ເຫັນວ່າບົດຄົ້ນຄວ້າມີຄວາມສຳຄັນທີ່ສຸດເພື່ອຮັບປະກັນວ່າພາກສ່ວນຕ່າງໆທີ່ກ່ຽວຂ້ອງ ຮັບຮູ້ກ່ຽວກັບໂອກາດ ແລະ ສິ່ງທ້າທາຍທີ່ເພີ່ມຂຶ້ນ ຂອງການເຊື່ອມໂຍງເສດຖະກິດຂອງອາຊີຕາເວັນອອກ. ລັດຖະມົນຕີຍັງຊຸກຍູ້ ERIA ໃຫ້ສ້າງຂໍ້ສະເໜີ ແລະ ແຜນທີ່ສາມາດຈັດຕັ້ງປະຕິບັດໄດ້ທີ່ໄດ້ຈາກຜົນຂອງກິດຈະກຳຕ່າງໆຂອງການຄົ້ນຄວ້າ.  
  8. ລັດຖະມົນຕີສະແດງຄວາມດີໃຈຕໍ່ຜົນຂອງກອງປະຊຸມຜູ້ບໍລິຫານ ERIA ທີ່ຈັດຂຶ້ນໃນວັນທີ 16 ມີຖຸນາ 2016. ລັດຖະມົນຕີຮັບຮູ້ວ່າຄະນະຜູ້ບໍລິຫານໄດ້ຮັບຮອງເອົົາພັນທະໃໝ່ຂອງ ERIA ຕໍ່ພາກພື້ນອາຊີຕາເວັນອອກ ດັ່ງທີ່ໄດ້ລະບຸໄວ້ໃນແຜນວຽກກາງສະໃໝ, ເຊິ່ງລວມມີການສ້າງຕັ້ງໜ່ວຍງານອອກແບບນະໂຍບາຍ, ສ້າງວິທີເຊື່ອມຕໍ່ເພື່ອສົ່ງເສີມການແລກປ່ຽນຄຳເຫັນກັບຜູ້ວາງນະໂຍບາຍໃນພາກພື້ນໃຫ້ຫຼາຍຂຶ້ນ ແລະ ມາດຕະການຕ່າງໆເພື່ອສົ່ງເສີມບົດຄົ້ນຄວ້າຂອງ ERIA ໃຫ້ດີຂຶ້ນ, ສ້າງຂີດຄວາມສາມາດ, ແລະ ກິດຈະກຳເຜີຍແຜ່ຕ່າງໆ.

ລັດຖະມົນຕີຂອບໃຈຕໍ່ ERIA ສຳລັບການສືບຕໍ່ໃຫ້ການຊ່ວຍເຫຼືອ ແລະ ຫວັງວ່າອົງການດັ່ງກ່າວຈະສືບຕໍ່ປະກອບສ່ວນເຂົ້າໃນວຽກງານການເຊື່ອມໂຍງຂອງພາກພື້ນ. ລັດຖະມົນຕີຊີ້ໃຫ້ເຫັນຄວາມສຳຄັນໃນການສົ່ງເສີມການພັດທະນາພາກພື້ນ ແລະ ການເຊື່ອມໂຍງເຂົ້າໃນປະຊາຄົມໂລກ ນອກນັ້ນ, ຈຸດສຸມຫຼັກຂອງ ERIA ເພື່ອປະກອບສ່ວນເຂົ້າໃນການສ້າງປະຊາຄົມອາຊຽນ ແລະ ອາຊີຕາເວັນອອກ. ຕໍ່ບັນຫານີ້, ລັດຖະມົນຕີຍັງໄດ້ຊຸກຍູ້ໃຫ້ປະເທດ EAS ສືບຕໍ່ເພີ່ມທະວີການສະໜັບສະໜູນໃຫ້ແກ່ ERIA.

 


 

Last Updated ( Friday, 19 August 2016 15:20 )  
You are here: Home News and Events News 4th EAS Economic Ministers’ meeting

Related Items