Foreign Trade Policy Department

    Lao (ພາສາລາວ)English

Main Menu

GATS Enquiry Point

WTO & AEC Center

Who's Online

We have 171 guests online

Visitor Counter

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterToday614
mod_vvisit_counterYesterday1306
mod_vvisit_counterThis week3271
mod_vvisit_counterLast week7238
mod_vvisit_counterThis month24908
mod_vvisit_counterLast month30915
mod_vvisit_counterAll days1097060

Trade and Investment Framework Agreement - TIFA

E-mail Print PDF

ກອງປະຊຸມຄັ້ງປະຖົມມະລຶກ ເພື່ອຈັດຕັ້ງປະຕິບັດສັນຍາຂອບວ່າດ້ວຍການຄ້າ ແລະ ການລົງທຶນ

ລະຫວ່າງ ສປປ ລາວ ແລະ ສະຫະລັດອາເມລິກາ

ໃນວັນທີ 22 ມີນາ 2017 ກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ໄດ້ເປັນເຈົ້າພາບຈັດກອງປະຊຸມຄັ້ງປະຖົມມະລຶກ ເພື່ອປະຕິບັດສັນຍາຂອບວ່າດ້ວຍການຄ້າ ແລະ ການລົງທຶນ ລະຫວ່າງ ສປປ ລາວ ແລະ ສະຫະລັດອາເມລິກາ (Trade and Investment Framework Agreement - TIFA), ຢູ່ທີ່ຫ້ອງປະຊຸມຂອງກະຊວງອຸດສາຫະກຳ ແລະ ການຄ້າ ຊຶ່ງຫົວໜ້າຄະນະຜູ້ແທນຝ່າຍລາວ ນໍາໂດຍ ທ່ານ ສົມຈິດ ອິນທະມິດ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ຫົວໜ້າຄະນະຜູ້ແທນຝ່າຍສະຫະລັດອາເມລິກາ ນໍາໂດຍ ທ່ານ ນາງ Barbara Weisel, ຜູ້ຊ່ວຍຫ້ອງການຜູ້ຕາງໜ້າການຄ້າອາເມລິກາ (U.S. Trade Representative - USTR) ມີຜູ້ຕາງໜ້າຈາກຂະແໜງການກ່ຽວຂ້ອງຂອງທັງສອງຝ່າຍເຂົ້າຮ່ວມລວມທັງໝົດ 25 ທ່ານ.

ຈຸດປະສົງຕົ້ນຕໍຂອງກອງປະຊຸມຄັ້ງນີ້ ແມ່ນເພື່ອຜັນຂະຫຍາຍການຈັດຕັ້ງປະຕິບັດສັນຍາຂອບວ່າດ້ວຍການຄ້າ ແລະ ການລົງທຶນລະຫວ່າງ ສປປ ລາວ ແລະ ສະຫະລັດອາເມລິກາ ທີ່ສອງຝ່າຍໄດ້ລົງນາມຮ່ວມກັນ ໃນວັນທີ 17 ກຸມພາ 2016 ທີ່ California, ສະຫະລັດອາເມລິກາ. ສັນຍາດັ່ງກ່າວນີ້ ສ້າງຂຶ້ນເພື່ອເປັນເວທີປຶກສາຫາລືກ່ຽວກັບການສົ່ງເສີມດ້ານການຄ້າ ແລະ ການລົງທຶນລະຫວ່າງ ສປປ ລາວ ແລະ ອາເມລິກາ. ກອງປະຊຸມຄັ້ງນີ້ ໄດ້ປຶກສາຫາລືຫຼາຍປະເດັນທີ່ທັງສອງຝ່າຍໃຫ້ຄວາມສົນໃຈ, ໂດຍສະເພາະການຈັດຕັ້ງປະຕິບັດສັນຍາຂອບວ່າດ້ວຍການຄ້າ ແລະ ການລົງທຶນ ລະຫວ່າງ ສປປ ລາວ ແລະ

ສະຫະລັດອາເມລິກາ,​ ການປະຕິບັດພັນທະໃນຂອບອົງການການຄ້າໂລກ, ການຮ່ວມມືດ້ານການຄ້າ ແລະ ການລົງທຶນລະຫວ່າງ ສປປ ລາວ ແລະ ສະຫະລັດອາເມລິກາ, ການຊ່ວຍເຫຼືອທາງດ້ານເຕັກນິກວິຊາການ. ນອກຈາກນີ້, ກໍ່ໄດ້ປຶກສາຫາລືກັນໃນການເພີ່ມມູນຄ່າການຄ້າໂດຍການແລກປ່ຽນໃຫ້ມີການພົບປະລະຫວ່າງນັກທຸລະກິດຂອງທັງສອງຝ່າຍ ແລະ ການສະໜັບສະໜູນ SMEs ໃນລາວ, ປັບປຸງບັນຍາກາດໃນການດຳເນີນທຸລະກິດໃນລາວ ແລະ ການອຳນວຍຄວາມສະດວກໃນການສົ່ງສິນຄ້າຈາກ ສປປ ລາວ ໄປຍັງຕະຫລາດສະຫະລັດອາເມລິກາ. ໃນໂອກາດດັ່ງກ່າວນີ້ ທ່ານ ສົມຈິດ ອິນທະມິດ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ປະທານກອງປະຊຸມ ໄດ້ສະແດງຄວາມຂອບໃຈໄປຍັງລັດຖະບານສະຫະລັດອາເມລິກາທີ່ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໂດຍຜ່ານໂຄງການ LUNA ໃນການປັບປຸງນະໂຍບາຍການຄ້າ ແລະ ປະຕິບັດພັນທະຂອງຕົນຕໍ່ສັນຍາຕ່າງໆທີ່ ສປປ ລາວ ເປັນພາຄີເຊັ່ນ: ໃນກອບອາຊຽນ ແລະ ອົງການການຄ້າໂລກ.

 

ທ່ານ ສົມຈິດ ອິນທະມິດ ໄດ້ເນັ້ນໃຫ້ເຫັນເຖິງການພົວພັນລະຫວ່າງລາວ ແລະ ອາເມລິກາໃນໄລຍະຜ່ານມາ ໂດຍສະເພາະການພົວພັນດ້ານການຄ້າໄດ້ມີບາດກ້າວຂະຫຍາຍຕົວຢ່າງເປັນປົກກະຕິ, ຜ່ານມາການພົວພັນແລກປ່ຽນການຢ້ຽມຢາມການນໍາລະດັບສູງຂອງສອງປະເທດ, ອັນພົ້ນເດັ່ນແມ່ນການໄປຢ້ຽມຢາມສະຫະລັດອາເມລິກາໃນຕົ້ນປີ 2016 ຜ່ານມາ ຂອງ ທ່ານ ນາງ ເຂັມມະນີ ພົນເສນາ, ລັດຖະມົນຕີກະຊວງອຸດສາຫະກຳ ແລະ ການຄ້າ. ພ້ອມນີ້, ທ່ານ ສົມຈິດ ອິນທະມິດ ໄດ້ກ່າວເຖິງການມາຢ້ຽມຢາມ ສປປ ລາວ ຂອງພະນະທ່ານ ບາລັກ ໂອບາມາ ປະທານາທິບໍດີສະຫະລັດອາເມລິກາໃນໂອກາດທີ່ ສປປ ລາວ ໄດ້ເປັນເຈົ້າພາບກອງປະຊຸມສຸດຍອດອາຊຽນ ໃນໂອກາດດັ່ງກ່າວນີ້ໄດ້ມີຖະແຫລງການຮ່ວມ ລະຫວ່າງ ພະນະທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ແລະ ພະນະທ່ານ ບາລັກ ໂອບາມາ ປະທານາທິບໍດີສະຫະລັດອາເມລິກາ.

ນອກຈາກນີ້,​ ກໍ່ໄດ້ໃຫ້ຊາບເຖິງມູນຄ່າການຄ້າ ລະຫວ່າງ ລາວ-ອາເມລິກາ ໃນປີ 2005 ບັນລຸໄດ້ 14,292 ລ້ານໂດລາສະຫະລັດ ແລະ ມາຮອດປີ 2016 ມູນຄ່າການຄ້າສາມາດບັນລຸໄດ້ 88,004 ລ້ານໂດລາສະຫະລັດ ຊຶ່ງສະຫະລັດອາເມລິກາແມ່ນຕະຫລາດສົ່ງອອກອັນດັບທີ 12  ແລະ ເປັນຕະຫລາດນໍາເຂົ້າອັນດັບທີ 10 ຂອງ ສປປ ລາວ. ໃນປີ 2005-2010 ການລົງທຶນຂອງອາເມລິກາຢູ່ລາວ ມີມູນຄ່າ 32,463,082 ລ້ານໂດລາສະຫະລັດ ແລະ ໃນໄລຍະ 2011-2015 ການລົງທຶນຂອງອາເມລິກາຢູ່ລາວບັນລຸໄດ້ 42,992,686 ລ້ານໂດລາສະຫະລັດ ຊຶ່ງໃນປະຈຸບັນສະຫະລັດອາເມລິກາ ແມ່ນຢູ່ໃນອັນດັບທີ 10 ຂອງການລົງທຶນໃນລາວ.

ກອງປະຊຸມໄດ້ສິ້ນສຸດລົງໃນວັນດຽວກັນ ດ້ວຍບັນຍາກາດອັນດີ ທັງສອງໄດ້ປຶກສາຫາລືກັນແບບກົງໄປກົງມາ ຕໍ່ກັບປະເດັນທີ່ສອງຝ່າຍໃຫ້ຄວາມສົນໃຈ ເພື່ອເພີ່ມທະວິການພົວພັນດ້ານການຄ້າ ແລະ ການລົງທຶນຂອງທັງສອງປະເທດໃຫ້ມີບາດກ້າວໃໝ່. ກອງປະຊຸມເຫັນດີໃຫ້ມີການສືບຕໍ່ກອງປະຊຸມໃນລັກສະນະດັ່ງກ່າວນີ້ຕໍ່ໜ້າ. ກອງປະຊຸມໄດ້ສິ້ນສຸດລົງໃນເວລາ 14:30 ໂມງ.

 


 
You are here: Home News and Events News Trade and Investment Framework Agreement - TIFA

Related Items