Foreign Trade Policy Department

    ພາສາລາວພາສາອັງກິດ

ເມນູຫຼັກ

ໜ່ວຍງານແຈ້ງຂໍ້ມູນ GATS

WTO & AEC Center

ຜູ້ທີ່ກຳລັງເຂົ້າຢ້ຽມຊົມ

ເຮົາມີ 104 ບຸກຄົນທົ່ວໄປ ອອນໄລນ

ສະຖິຕິຜູ້ເຂົ້າຢ້ຽມຊົມ

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
mod_vvisit_counterToday95
mod_vvisit_counterYesterday686
mod_vvisit_counterThis week2814
mod_vvisit_counterLast week6477
mod_vvisit_counterThis month26514
mod_vvisit_counterLast month31196
mod_vvisit_counterAll days1130835

Trade in Services

ອີເມລ ພິມ PDF
There are no translations available.

ຄວາມສຳຄັນຂອງຂະແໜງບໍລິການ

ຂະ​ແໜງບໍລິການ ມີຄວາມສໍາຄັນຍິ່ງຕໍ່ການພັດທະນາເສດຖະກິດ-ສັງຄົມ​ແຫ່​ງຊາດຂອງ ສປປ ລາວ. ​ໃນ​ນີ້ ຂະແໜງບໍລິການ ກວມເອົາປະມານ 37% ຂອງລວມຍອດຜະລິດຕະພັນແຫ່ງຊາດ (GDP) ຂອງ​ລາວ ໃນປີ 2011, ສົມທຽບກັບອັດຕາສ່ວນຂອງຂະແໜງກະສິກຳ 28% ແລະ ຂອງຂະແໜງອຸດສາຫະກໍາ 35%. ການຄ້າຕ່າງປະເທດດ້ານບໍລິການ (ຕົ້ນຕໍ​ແມ່ນ​ ການທ່ອງທ່ຽວ, ການ​ບໍລິການ​ຜ່ານ​ນ່ານຟ້າ) ຂະ​ຫຍາ​ຍຕົວ​ໃນ​ອັດຕາ 7% ຕໍ່​ປີ ​ໂດຍຂະຫຍາຍ ຕົວສູງກວ່າການສົ່ງອອກດ້ານສິນຄ້າ. ຂະແໜງຂາຍຍົກ-ຂາຍຍ່ອຍ[1] ຍັງເປັນຂະແໜງທີ່ສ້າງວຽກເຮັດງານທໍາໃຫ້ປະຊາຊົນຫຼາຍກວ່າ​ໝູ່ ​ໃນ​ບັນດາ​ຂະ​​ແໜງບໍລິການ​ທັງ​ໝົດ. ນອກນີ້ ຍັງມີຂະແໜງ ບໍລິການອື່ນໆ ທີ່ສຳຄັນຕໍ່ລະບົບເສດຖະກິດ ເຊັ່ນ: ໂທລະຄົມ, ບັນຊີ ແລະ ກວດສອບ, ປະກັນໄພ, ທະນາຄານ, ກໍ່ສ້າງ ແລະ ຂົນສົ່ງ.

ການຄ້າ​ດ້ານ​ການ​ບໍລິການ​

ສັນຍາ​ວ່າ​ດ້ວຍ​ການ​ຄ້າ​ດ້ານ​ກາ​ນບໍລິການ (GATS) ໄດ້ຈັດແບ່ງການບໍລິການອອກເປັນ 12 ຂະແໜງໃຫຍ່ ຄື 1) ການບໍລິການທຸລະກິດ; 2) ໄປສະນີດ່ວນ, ໂທລະຄົມ ແລະ ການສື່ສານອື່ນໆ; 3) ການກໍ່ສ້າງ; 4) ການຈຳໜ່າຍ; 5) ການສຶກສາ; 6) ສິ່ງແວດລ້ອມ; 7) ສຸຂະພາບ; 8) ການປະກັນໄພ, ທະນາຄານ ແລະ ການເງິນອື່ນໆ[2]; 9) ການທ່ອງທ່ຽວ; 10) ວັດທະນາທຳ; 11) ການຂົນສົ່ງທາງບົກ,​ ນໍ້າ ແລະ ອາກາດ; ແລະ 12) ອື່ນໆ. ໃນນີ້ ຍັງໄດ້ມີການແຕກລະອຽດອອກຕື່ມ ເປັນປະມານ 160 ຂະແໜງຍ່ອຍ.

ການ​ເຈລະຈາ​ເປີດ​ຂະ​​ແໜງ​ບໍລິການ ​ໂດຍ​ພື້ນຖານ​ແມ່ນ​ເນັ້ນ​ໜັກ​ການ​ເປີດ​ກວ້າງ ​ໃນຮູບ​ແບບທີ 3: ກາ​ນສ້າ​ງຕັ້ງວິ​ສາ​ຫະກິດ (Commercial presence).  ​ແຕ່ຮູບ​ແບບທີ 4: ການ​ເຄື່ອນ​ຍ້າຍ​​ແຮງ​ງານ ​(Movements of natural persons) ແມ່ນມີ​ຂໍ້​ຈໍາກັດ ກໍຄື​ຂໍ້​ສະຫງວນ​ຫຼາຍ​ທີ່​ສຸດ ສ່ວນອີກ​ສອງ​ຮູບ​ແບບ​ອື່ນໆ ​ແມ່ນ​ມີ​ລັກສະ​ນະ​ເປີດ​ກວ້າງ​​ຫຼາຍ ​ຄື: ຮູບ​ແບບທີ 1​: ການ​ບໍລິ​ການ​ຂ້າມ​ຊາຍແດ​ນ (Cross-Border supply) ​ແລະຮູ​ບ​ແບບທີ 2​: ການ​ໃຊ້​ບໍລິ​ການ​ຢູ່​ຕ່າງປະ​ເທດ (Consumption abroad).

ການເຈລະຈາ​ດ້ານ​ບໍລິການ​ໃນ​ການເຂົ້າ​ເປັນ​ສະມາຊິກ ອຄລ

ສປປ ລາວ ​ໄດ້​ປະເຊີນກັບຄວາມທ້າທາຍໃນການ​ເຈລະຈາເຂົ້າເປັນສະມາຊິກ ອຄລ ລວມທັງການເປີດຂະແໜງບໍລິການ ເນື່ອງຈາກຖືກຮຽກຮ້ອງສູງຈາກສະມາຊິກຄູ່​ເຈລະຈາ. ເຖິງແນວໃດກໍຕາມ ຄວາມສໍາເລັດກໍ​ຄືບົດຮຽນໃນການເຊື່ອມໂຍງ​ເສດຖະກິດຂອງ ຈີນ ​ແລະ ຫວຽດນາມ ​ໄດ້ສ່ອງ​ແສງໃຫ້ເຫັນວ່າການປະຕິຮູບດ້ານເສດຖະກິດ ລວມທັງການເຊື່ອມໂຍງເຂົ້າພາກພື້ນ ແລະ ສາກົນ ແມ່ນເຄື່ອງມືອັນສໍາຄັນ ເພື່ອສ້າງເສດຖະກິດພາຍໃນໃຫ້ເຂັ້ມແຂງ ແລະ ຍົກສູງບົດບາດອິດທິພົນດ້ານ​ການ​ເມືອງ ​ແລະ ​ເສດຖະກິດ ໃນເວທີສາກົນ.

ປະຈຸບັນ ສປປ ລາວ ​​ໄດ້​ສະຫຼຸບ​ການ​ເຈລະຈາການ​ຄ້າ​ດ້ານ​ບໍລິການ​ໃນ​ຂອບ​ ອຄລ ກັບ​ທັງ​ໝົດ 9 ຄູ່ສະມາຊິກ​ທີ່​ໄດ້​ເຈລະຈາ​ສອງ​ຝ່າຍ​ກັບລາວ. ລາຍ​ລະອຽດ​ກ່ຽວ​ກັບ​ຂະ​ແໜງ ຍ່ອຍ​ ​ແລະ ລະດັບ​ຂອງ​ການ​ເປີດ​ດ້ານ​ບໍລິການ ຈະ​ໄດ້​ນຳ​ສະ​ເໜີ​ຕື່ມພາຍຫຼັງທີ່ ສປປ ລາວ ​ໄດ້​ສຳ​ເລັດ​​ຂັ້ນ​ຕອນສຸດ​ທ້າຍ​ຂອງ​ການ​ເຂົ້າ​ເປັນສະມາຊິກ​ພາຍ​ໃນ​ທ້າຍ​ປີ 2012 ​ນີ້. ສະມາຊິກ​ທີ່ຫາກໍເຂົ້າ​ ອຄລ ໃໝ່ອື່ນໆ ມີ​ລະດັບ​ການ​ເປີດ​ຂະ​ແໜງ​ບໍລິການ​ໂດຍ​ສະ​ເລ່ຍ ເຊັ່ນ: ​ກຳປູ​ເຈຍ​​ ໄດ້ເປີດ 96 ຂະ​ແໜງ​ຍ່ອຍ (​ເປັນ​ສະມາຊິກ ປີ 2004), ຫວຽດນາມ 98 ຂະແໜງຍ່ອຍ (ປີ 2009) ​ແລະ ຊາມົວ 81 ຂະແໜງຍ່ອຍ (ປີ 2012). ການເປີດຂະ​ແໜງ​ບໍລິການ​ໃນ​ຂອບ​ການ​ຄ້າ​ຫຼາຍ​ຝ່າຍ​ນີ້ ກໍ​ດຳ​ເນີນ​ຄຽງ​ຄູ່​ກັບ​ການ​ກະກຽມ​ເຂົ້າ​ຮ່ວມ​ປະຊາ​ຄົມ​ເສດຖະກິດ​ອາ​ຊຽນ​ ​(AEC) ເວົ້າ​ລວມ, ​ເວົ້າ​ສະ​ເພາະ ​ການ​ເປີດ​​ເສລີດ້ານບໍລິການຢ່າງເຕັມສ່ວນ ພາຍໃນ ປີ 2015. ປະຈຸ​ບັນ ​ການ​ເປີດ​ຂະ​ແໜງ​ບໍລິການ​ໃນ​ຂອບ​ອາ​ຊຽນ ​ແມ່ນ​​ໄດ້ສຳ​ເລັດ​ພູດ​ທີ 8 ພາຍ​ໃນ​ກາງ​ປີ 2012.

​ໃນ​ການ​ກະກຽມ​ເຂົ້າ​ເປັນ​ສະມາຊິກ ອຄລ ກໍ​ຄື​ເລີ່​ມຈັດ​ຕັ້ງ​ປະຕິບັດ​ພັນທະ ​ແລະ ຂໍ້​ຜູກ​ພັນ​ທີ່​ໄດ້​ໃຫ້​ແກ່​ສະມາຊິກ​ນັບ​ແຕ່​ມື້​ເຂົ້າ​ເປັນສະມາຊິກ ອຄລ ​ເປັນ​ຕົ້ນ​ໄປ ກະຊວງ​ອຸດສາຫະກໍາ ​ແລະ ການ​ຄ້າ ພ້ອມ​ທັງ​ບັນດາ​ກະຊວງ​ຂະ​ແໜງ​ການ ຈ​ະ​ໄດ້​ເອົາ​ໃຈ​ໃສ່​ບາງ​ໜ້າ​ວຽກ​ສໍາຄັນ ດັ່ງ​ລຸ່ມ​ນີ້:

  • ເອົາໃຈໃສ່​ໃນ​ການ​ເຜີຍ​ແຜ່ ​ແລະ ສ້າງ​ຄວາມ​ເຂົ້າ​ໃຈກ່ຽວກັບພັນທະ ​ກໍ​ຄືຂໍ້ຜູກພັນ​ຂອງ​ແຕ່​ລະ​ພາກສ່ວນ ເພື່ອດໍາ​ເນີນ​ການຈັດຕັ້ງປະຕິບັດ ຢ່າງມີປະສິດທິຜົນ;
  • ທົບ​ທວນ, ສ້າງ ແລະ ປັບປຸງນິຕິ​ກໍາຄຸ້ມ​ຄອງ​ບັນດາ​ຂະ​ແໜງ​ບໍລິການ​ທີ່​ໄດ້​ສະ​ເໜີ​ເປີດ ໃຫ້ສອດຄ່ອງກັບພັນທະທີ່ໄດ້ຮັບ ລວມທັງ​ ​ພັນທະ​ລວມ ​ແລະ ພັນທະ​ສະ​ເພາະ;
  • ສືບ​ຕໍ່​ການຈັດ​ຕັ້ງ​ປະຕິບັດ​ພັນທະ​ທີ່​ໄດ້​ສະ​ເໜີ​ເປີດຂະ​ແໜງ​ບໍລິການ​ທັງ​ໃນ​ຂອບ ອຄລ ​ແລະ ອາ​ຊຽນ ບົນ​ພື້ນຖານ​ນິຕິ​ກໍາ​ທີ່​ໄດ້​ພັດທະນາ​ເພື່ອ​ຮອງ​ຮັບການ​ເຊື່ອມ​ໂຍງ​ເຫຼົ່ານີ້ ລວມທັງ​ຂອດການອະນຸຍາດສ້າງ​ຕັ້ງ​ວິ​ສາ​ຫະກິດທົ່ວ​ໄປ-ການ​ສໍາ​ປະທານ, ການ​ຄຸ້ມ​ຄອງ​ການ​ເຄື່ອນ​ໄຫວຂອງທຸລະກິດ ໆ​ລໆ;
  • ຍົກ​ສູງຄວາມ​​ເຂັ້ມ​ແຂງ​ດ້ານ​ສະ​ຖາ​ບັນ ​ໂດຍ​ສະ​ເພາະ ​ໃນ​ຂະ​ແໜງ​ການ​ເງິນ-ການ​ທະນາ ຄານ ​ແລະ ​ໂທລະ​ຄົມ ​ໃຫ້​ສອດຄ່ອງ​ກັບ​ພັນທະ​ທີ່​ໄດ້​ໃຫ້ ກໍ​ຄືວິທີ​ປະຕິບັດ​ໃນ​ພາກ​ພື້ນ ​ແລະ ສາກົນ.
  • ກະກຽມ​ບັນດາ​ເງື່ອນ​ໄຂປັດ​ໄຈ ​ແລະ ສົ່ງ​ເສີມ​ຂະ​ແໜງ​ບໍລິ​ການ​ທີ່ ສປປ ລາວ ມີ​ໜໍ່​ແໜງ​ໃນ​ການສົ່ງ​ອອກ (​ການທ່ອງ​ທ່ຽວ​) ຫຼື ມີ​ທ່າ​ແຮງ (ການ​ຂົນ​ສົ່ງ​,​ ການ​ບໍລິການ​ປິ່ນ​ອ້ອມບໍ່​ແຮ່, ການ​ທະນາຄານ, ວິຊາຊີບ[3]) ​ໃຫ້​ມີ​ຄວາມ​ເຂັ້ມ​ແຂງ​ສາມາດ​ແຂ່ງຂັນ​ໄດ້​ທັງ​ໃນ​ຕະຫຼາດ​ພາຍ​ໃນ ​ແລະ ຕ່າງປະ​ເທດ ​ເພື່ອ​ຍາດ​ແຍ່ງ​ກາລະ​​ໂອກາດ​ຈາກ​ການ​ເປີດ​ຕະຫຼາດ​ຂອງ​ສະມາຊິກ ອຄລ ທີ່​ມີ​ແກ່​ທຸກ​ສະມາຊິກ.

ພັນທະ ​ແລະ ຂໍ້​ຜູກ​ພັນ​​ໃນ​ການ​ເປີດ​ຂະ​ແໜງ​ບໍລິການ

ພັນທະໃນການເປີດຂະແໜງບໍລິການ ປະກອບດ້ວຍ:  ພັນທະລວມ ແລະ ພັນທະສະເພາະ.  ພັນທະລວມ (Horizontal Commitments) ໝາຍເຖິງ ພັນທະທີ່ກວມເອົາທຸກໆ ຂະແໜງບໍລິການ ທີ່ນອນໃນ ຕາຕະລາງຂໍ້ຜູກພັນ. ຕົວຢ່າງ ເງື່ອນໄຂການສ້າງຕັ້ງວິສາຫະກິດ ​ໂດຍ​ພື້ນຖານ​ແລ້ວ​ແມ່ນ​​ປະຕິບັດ​ຕາມ​ກົດໝາຍ​ວິ​ສາ​ຫະກິດ, ກົດໝາ​ຍສົ່ງ​ເສີມ​ການ​ລົງທຶນ, ນະໂຍບາຍອາກອນ ຫຼື ການຖົມຂຸມອື່ນໆ ​ແລະ ການ​ນໍາ​ໃຊ້​ແຮງງານ​ຕ່າງປະ​ເທດ. ນອກນີ້, ຍັງ​ມີ​ພັນທະພື້ນຖານໄດ້ລະບຸໄວ້ໃນສັນຍາທົ່ວໄປວ່າດ້ວຍການຄ້າດ້ານການບໍລິການ (GATS) ເຊັ່ນ: ການ​ບໍ່ຈໍາ​​ແນ​ກການ​ບໍລິການ/ຜູ້​ສະໜອງ​ບໍລິກາ​ນຈາກ​ສະມາຊິກ​ໃດ​ໜຶ່ງ ທີ່ຮຽກ​ວ່າ ​ຫຼັກການປະຕິບັດແບບຊາດທີ່ໄດ້ຮັບອະນຸເຄາະຍິ່ງ (MFN), ຄວາມໂປ່ງໃສ​ໃນ​ການພິມ​ເຜີຍ​ແຜ່ລະບຽບການຄຸ້ມ​ຄອງ​ຂະ​ແໜງ​ບໍລິການ ​ແລະ ການຮັບຮູ້ເຊິ່ງກັນ ແລະ ກັນສໍາລັບຄຸນນະວຸດທີ່ຈໍາເປັນຂອງ​ຜູ້ສະໜອງບໍລິການ.

ສໍາລັບ​ພັນທະ​ສະ​ເພາະ (Specific Commitments) ໝາຍເຖິງ ພັນທະ ຫຼື​ຂໍ້​ຜູກ​ພັນທີ່ໄດ້ກໍານົດລະອຽດ​ໃນ​ແຕ່ລະ​ຂະ​ແໜງ​ຍ່ອຍ ​ແລະ ຮູບ​ແບບ​ການ​ບໍລິການ. ຕົວຢ່າງ: ຂະແໜງ ທ່ອງທ່ຽວ ຕ່າງປະເທດສາມາດຖືຮຸ້ນໄດ້ສູງ​ສຸດ 70% ​ໃນ​ການ​ສ້າງ​ຕັ້ງ​ໂຮງ​ແຮມ​ລະດັບ 3 ດາວ​ຂື້ນ​ໄປ ​ແລະ ການ​ນໍາ​ທ່ຽວ​ເປັນ​ອາຊີບ​ສະຫງວນ​ສໍາລັບ​ຄົນ​ລາວ. ​ການບໍລິການໂທລະຄົມ ອະນຸຍາດ​ໃຫ້​ຕ່າງປະ​ເທດຮ່ວມລົງທຶນ​ໄດ້​ໃນ​ລະດັບ​ໃດ​ໜຶ່ງ ​ແລະ ​ການ​ປະຕິບັດ​ພັນທະ​ໃນ​ການ​ເອກະ​ສານ​ອ້າງ​ອີງ​ (Reference paper) ​ສໍາ​ລັບຂົງ​ເຂດໂທລະ​ຄົມ​ພື້ນ​ຖານ ເຊັ່ນ: ການ​ແຍກ​ພາລະ​ບົດບາດ​ອົງ​ການ​ຄຸ້ມ​ຄອງ​ອອກ​ຈາກຂອງວິສາຫະກິດ (Independent regulator). ​



[1] Add link to study on distribution

[2] Add link to study on insurance

[3] To add link to study on professional services (after finalization)

ແກ້ໄຂລ່າສຸດ ( ມື້ຈັນທີ່ 20 ສິງຫາ 2012 ເວລາ 15: 33 )  
You are here: Home ຄວາມສຳພັນດ້ານການຄ້າ ອົງການການຄ້າໂລກແລະສປປລາວ ການຄ້າດ້ານບໍລິການ